కటక్ ఆసుపత్రి ఐసీయూలో మంటలు.. 10 మంది సజీవ దహనం

ఒడిశాలో ఘోర విషాదం చోటుచేసుకుంది. కటక్‌లోని ప్రభుత్వ ఎస్సీబీ మెడికల్ కాలేజ్ అండ్ హాస్పిటల్‌లో సోమవారం తెల్లవారుజామున భారీ అగ్నిప్రమాదం జరిగింది. ఈ దుర్ఘటనలో 10 మంది రోగులు మృతి చెందారని ముఖ్యమంత్రి మోహన్ చరణ్ మాఝీ ధ్రువీకరించారు. షార్ట్ సర్క్యూట్ కారణంగానే ఈ ప్రమాదం జరిగిందని ప్రాథమికంగా భావిస్తున్నారు.

సోమవారం తెల్లవారుజామున 3 గంటల సమయంలో ఆసుపత్రిలోని ట్రామా కేర్ ఐసీయూలో ఒక్కసారిగా మంటలు చెలరేగాయి. ఆ సమయంలో ఐసీయూలో సుమారు 15 మంది రోగులు చికిత్స పొందుతున్నారు. వీరిలో చాలామంది వెంటిలేటర్, ఆక్సిజన్ సపోర్ట్‌పై ఉండటంతో సహాయక చర్యలకు తీవ్ర ఆటంకం ఏర్పడింది. సమాచారం అందుకున్న వెంటనే అగ్నిమాపక సిబ్బంది, ఆసుపత్రి సిబ్బంది హుటాహుటిన సహాయక చర్యలు చేపట్టారు. అయితే, అప్పటికే ఏడుగురు రోగులు ఐసీయూలోనే ప్రాణాలు కోల్పోగా, మరో ముగ్గురు రోగులను వేరే వార్డుకు తరలిస్తుండగా మరణించారు.

ఘటనా స్థలాన్ని సందర్శించిన సీఎం మోహన్ చరణ్ మాఝీ, ఆరోగ్య మంత్రి ముఖేశ్ మహాలింగ్ పరిస్థితిని సమీక్షించారు. ప్రమాదంపై తీవ్ర దిగ్భ్రాంతి వ్యక్తం చేసిన సీఎం, ఘటనపై న్యాయ విచారణకు ఆదేశించారు. మృతుల కుటుంబాలకు రూ. 25 లక్షల చొప్పున ఎక్స్‌గ్రేషియా ప్రకటించారు. సహాయక చర్యల్లో పాల్గొన్న 23 మంది ఆసుపత్రి సిబ్బంది పొగ కారణంగా అస్వస్థతకు గురవగా, వారిని చికిత్స కోసం ఆసుపత్రిలో చేర్పించారు.